هاف بوست

عراقي

Home » (حرامية)… من ذاك الوكت…

(حرامية)… من ذاك الوكت…

هاف بوست عراقي ـ نذير الأسدي:

١

حراميه…
من ذاك الوكت…

تاسرت عام ١٩٨٢..
بمعركه قادسيه صدام الامجيده….
بمنطقه الطيب..
نقلونه بلوريات مكشوفه لديزفول..
ومن ديزفول لطهران..
اول شي اخذوا مني هو البسطال..وبدلوه بنعال عتيك
ظليت اني وبقيه الاسرى .. بهدومنا لمده شهرين او ثلاث…
اخيرا قرر الايرانيون اسنبدال ملابسنا الرومانيه ..بملابس ايرانيه تشبه بدلات عمال النظافه .كانت خفيفه جدا مثل كشر بصل..
وانطونا وياها لباس داخلي..
وقررت ان اسبح واتخلص من التراب والدم ..حتى لو بمي بارد.رغم بروده الجو…
ومن طلعت من الحمام لبست البدله بدون لباس داخلي…
واني مكيف صار عندي لباس جديد غسلته وشريته على الاسلاك….
بعد نص ساعة رجعت ا دور على اللباس شفت مكانه فارغ..
تعجبت …كلت معقوله واحد يبوك لباس… قابل هو لباس سعاد حسني…لو لباس فيفي عبده.
وظليت حاير…
احد الاسرى تبرع لي بوزره قديمه مال حمام وكالي من تسبح ظل بالوزره..اذا جان بنطرونك وسخ بس من تغسله ..اكعد كباله…تره اتظل بطرك الوزره..
بعد عده ايام كمت اشوف هواي اسرى يتمشون بطرك الوزره…لان باكو لبسانهم وبنطلوناتهم….
ومن سمع الضابط الايراني جمع المعسكر .وكال….
عرفنا الذهب والفلوس والاشياء الثمينه تنباك…
بس اني ما سامع واحد يبوك لباس مال اخوه وهو ما عنده غيره….هسه اني منين اجيب لبسان……
كلها ضحكت….وحتى الحراميه الي باكو لبسانه…هم ظلوا يضحكون….واني ظليت صافن اذا كل الاسرى تضحك..
لعد منو باك اللبسان..
اني على يقين ذوله الي باكو لبسانه اليوم هم بمناصب عاليه بالحكومه….
يجوز نواب لو وزراء.
لو رؤساء كتل..
ديروا بالكم منهم…
والله حتى لبسانكم يجي يوم
ايبوكوها….وتظلون تتمشون بالوزره….
لو يسفروكم لجزيره العراة..
وخاف نظل نتمشى بالشوارع..
بدون لبسان….
والنسوان تضحك علينه…

 

٠٠٠٠

٢

١٩٧٤……

جنت جندي ادوام بسريه حراسه الديوانيه..
فد يوم تفاجئت بنقلي من الديوانيه ..لاربيل
ومن اربيل نسبونه على فوج بمركز مدينه( ديانا)) الجميله
تمركزنا تحت جبل زوزك
ارض خضره ونهر وجبال شاهقه ..منظر يريح النفس
بس ابنادم مايكعد راحه.
اجه امر بنقلي الى موقع متقدم عند وادي وجبال ((تاتان))..
صعدت الى منطقه وعره جدا وبعيده عن الفوج ماتصل السياره الها الا بطلاع الروح
قريبه على الحدود الايرانيه
وصلت لمقر السريه
ولكيت امر السريه ملازم اسمه ملازم سعد..
الرجال طيب وماله شغله ..بس يوميه ينصب بطل العرك ومكضيها من الصبح لليل يسمع اغاني ويضرب قصعه …
اول يومين نصب العداوه وياي نائب عريف اسود شراني…وهتلي ومنافق
بس الكواد جانت صلاته وتسبيحاته حيل مضبوطه
ويوميه يهددني..
كالي انت لازم تصعد للربيه فوك جبل ((حصاروست))
صعدت وما كدرت لان الجبل جان حيل عالي…ونزلت وتعارك وياي شلون تنزل
رحت للضابط وحجيت قصتي ….
كالي اذا ما تكدر…
لعد راح اسلمك البغل ..
يوميه تترس مي من الوادي..للسريه
ظليت يوميه اخذ البغل وانزل للوادي..اترس مي واصعده على ظهر البغل واصعد للسريه…
يوم من الايام بعد ماترست الجلكانات مي وصعدتهن على ظهر البغل..صعدت للجبل اسوك بالبغل…
ليش ما البغل وكف وبعد مايقبل يصعد..حاولت وياي
ما رهمت وياي جاره..
صرت وراه وكمت اسوكه بالعوده…
وجان ما اهيس غير ضربني زوج شمرني اكثر من خمس امتار وكام يشاهك
وظليت حاير شأسوي
وره شويه البغل ارتاح وصعد وحده..ظليت صافن على مزاج البغل
من وصلت للسريه لكيت وحده من رجليه مكسوره…
وحجيت للضابط …
وجان العريف الاسود واكف على راسي…وسمع الكلام
وكالي …
اذا ماتكدر للبغل عوفه وتعال يمي الزم واجبات…ليليه
صفنت وكلت للضابط..سيدي
البغل مايغثني ولا يهددني ولا ينافق علي…
خليني اتحمل زگطاته…حتى لو ضربني بكلبي…
ولا الكلام الناعم مال العريف الاسود…يوميه راكعني بتقرير
ضحك الضابط .. وهو يجر كلاص العرك..وكالي
ظل وي البغل وكال للعريف عوفه هذا الرجال معلم وباجر راح يتسرح..خطيه
وظليت وي البغل اتحمل زگطاته وصفناته….
الى ان تسرحت من اعلى قمه جبليه…
بس والله ظل كلبي يحن لذاك البغل..لان بكد ماتعبني ..ريحني وبعد عني سوالف ومكسرات ونفاق …
العريف الاسود…
ومن ذاك اليوم لليوم
ياريت على زگطات البغل..
ولا زكطات بنادم…
وللبغال…
مواقف…

 

تابع صفحتنا في فيسبوك

مصادر: وكالات – تواصل اجتماعي – رصد وتحرير و نشر محرري الموقع 

وكالة تنشر النصوص بلا قيود..  المواد المنشورة تعبر عن وجهة نظر مصدرها

اكتب لنا: iraqhuffpost@gmail.com

 

0 0 vote
Article Rating
Subscribe
نبّهني عن
guest
0 تعليقات
Inline Feedbacks
View all comments
Copyright © All rights reserved. | Newsphere by AF themes.
0
Would love your thoughts, please comment.x
()
x