دگة احسوني … سالفة قدیمة

هاف بوست عراقي ـ كتب فاضل شناشيل: دگة احسوني … سالفه قدیمه، فرد يوم گاعدين بالگهوخانه وشفت ابو عدنان بالصدفه جاي من شهربان وإستغربت من جيته لبغداد … الرجال مو من عوايده يزور بغداد الا اذا چانت عنده شغله .. وهذول يعتبروها چبيرة بحقهم اذا نزلوا لبغداد , إحتمال أحد يضحك عليهم لو يتشاقه وياهم وخاصة الملاچه واهل بغداد معروفین بشقندحیاتهم ویا الرایح والجاي .

_ إشجابك ؟ منو دلاك بغداد ؟
ضحك وگال
_ من ورا إحسوني .
_ إحسوني منو ؟
_ اسولف لك ,,,, هذا حسوني إبن ولايتنا شهربان و عاف شهربان من زمان وتلگاه يوم بابو صيدا ويوم بخانقين ويوم ابعگوبه وآخرها شفته ابغداد وك ها حسون شتسوي هنا ؟ اشجابك لبغداد تشتغل ماتشتغل ومن هالسوالف . گال عمي بغداد وأهلها بخدمتك , وبیني وبینک چانت عندي شغله بالنفوس العامه وراها لازم اروح للسراي علمود چم شغله أكملهن وحسون گال آني موجود .! شتريد حاضر وكل اللي يشتغلون بالسراي ربعي وبالجيب , گلت والله يمكن حسون صاير قايم مقام بغداد . چنت نايم بالاوتيل اللي بالرشيد . گال ولايهمك عمي باچر الصبح تلگاني يمك ونتوكل . الصبح جاني وجايب وياه ربل ( العربنچي ) وياه هماتین ابنه وابن أخوه , سلمت عليهم حسب الاصول .
وصلنا النفوس العامه حسون سئل ابو العربنجي اشگد تؤمر ؟
_ جاوبته بالعظيم متدفع حسون ؟ وین صایره وین دایره ؟ فوگ زينيتك اتريد تدفع الكروه ؟
_ بكيفك عمي .
دفعت الكروه من نزلنا اباب النفوس و چان اكوش شرطي واگف اباب مأمور النفوس چان يروح حسون ومدري اشگله صنتاوي وناوشه فرد شي . سئلته اشگد نطيته حسون ؟
_ خليها على حسابي عمي ؟
_ بالعظيم ميصير .
_ مو هوايه عمي , ربع دينار .
طلعت من جيبي وناوشته ربع الدينار , گتله ليش ناوشته ربع ؟
گال علمود ايطببنا على المأمور , المهم خشيت والمأمور رجال بسيط كمل الاوراق ونطاني اياه وطلعت .
_ حسون شوفلنا مطعم علمود ناكل .
_ صار .
وداني لمطعم نظيف ولابسين صداري وچان ايگول جيب ترتيبات أهم شي الترتيبات .
_ ترتيبات شنو ؟
_ طماطه وخيار وبصل وكرفس وطرشي .
_ أها .
وكل اشويه ايصيح كثر طرشي كثر بصل وين الكباب ؟ وين القوزي ؟ وين التمن ؟ خليلي حكاكه فوگ التمن , عدكم لبن ؟ جيبلنا لبن لبن بالصراحیه . … المهم اكلنا وحسبت حساب ما يطلع دينارين وچان ايگول ابو المطعم خمس دنانير . !!
بصراحه خابرت مرتي وسولفت لها وجان اتگول اشدعوه خمس دنانير ؟ الطلي كامل مكمل بخمس دنانير هنا بشهربان ؟ المهم گتلها ميخالف ميضيع .
_ يا ابو عدنان اذا انتوا اربع نفرات و رايحين لمطعم فاخر اكيد غالي .
_ بيني وبينك صارت عندي لَويّه من ورا الاكل , إجاني للاوتيل گال باجر نطلع للسراي . گلت له شوف لنا غير مطعم حسون هذا المطعم ذبحنا بالترتيبات . چان ايگول صار عمي افتهمتك . …. ثاني يوم إجاني وجايب وياه هماتين ابن اخوه وابنه ورحنا على مطعم على اساس ارخص اشويه وبلا هاللعبان نفس مال الترتيبات . وداني لمطعم اسمه تاجران وچان ايصيح حجي عباس الفیلی الظاهر یعرفه و نزل لعمنا دجاج و وصله چبيرة هرفي وخليلنا من اللذين .
_ من اللذين شنو ؟
_ أخو الترتيبات بالرضاعه . المهم أكله طيب بس آني ما متعود على هالمطاعم وچان ايمد ايده ابجيبه وايگول لإبن أخوه لاتخلي عمك يدفع . يقصدني آني , وگلت عيب الرجال مكلف نفسه وجاي وياي لازم ادفع لهم فلوس الاكل واشوفلك الحساب اربع دنانير ,!!
كلت ويا نفسي لو رايح بوحدي ومكمل الاوراق ما چان صرفت النهار كله نص دينار ….. بيني وبينك أكله طيب بس الفلفل شعوطني والليل كله اصيح آخ بطني . وإچروووووووووب من الصبح شفته هو والربل والربع جايين , أدري انت يالعربنجي ماخذه قنطرات وياهم لو شنو ؟ گلت خلي اصارحه البارحه مانمت من ورا شعواط بطني بالاكل , مو بس هذا اذا ابقى ابغداد بعد اسبوع راح أفلس من وراه وايجوز ارهن البستان بشهربان .
_ صباح الخير عمي .؟
_ صباح الخير إحسوني وين راح نروح ؟
_ للسراي حتى نخلص الاوراق يم هذا ابو قدوري صديقي .
_ إحسوني تدري البارحه شعواط الفلفل مدري الكركم الزايد حرگ بطني . فالله يخليك ودينا لمطعم من هذول اللي يبيعون على الشارع , ما اريد لا ترتيبات ولا من اللذين .
_ إفتهمتك عمي صار .
والله ومن خلصت الاوراق ودانه لمطعم كبابجي ماعنده غير بس خبز وكباب , گلت هو هذا الزين ماكو غيره ، ويا نفسي گلت الحمد لله هذا على الاقل ارخص من هذولاك . اکلنا و ربع حسون ملتهين بالاكل هماتین وحسوني خلص وطلع واگف بالباب د ينظف سنونه من ورا الكباب , سئلت الكبابجي اشگد الحساب ؟ گال اربع دنانير !!!؟
_ ما لتيش اربع دنانير ؟
_ ست نفرات ماكلين كباب , وسفري خليتلكم اربع نفرات .
_ ومنو طلب سفري اربع نفرات ؟
_ صاحبك اللي بالباب گال مو بالليل نحب نتعشى بيهن .
………….
وراها خابرت مرتي وسولفت لها گالت عوف بغداد بالعجل ترا يهلسوك ويفلسوك ونرهن البستان

مصادر: وكالات – تواصل اجتماعي – رصد وتحرير و نشر محرري الموقع 

وكالة تنشر النصوص بلا قيود..  المواد المنشورة تعبر عن وجهة نظر مصدرها

اكتب لنا: iraqhuffpost@gmail.com

65 متابع ...
0 0 vote
Article Rating
Subscribe
نبّهني عن
guest
0 تعليقات
Inline Feedbacks
View all comments